اسلام آباد ۔ 31 جولائی (اے پی پی)وزیراعظم عمران خان نال اقوام متحدہ دے ریذیڈنٹ کوآرڈینیٹر نیل بوہنے بدھ کوں اتھاں وزیراعظم آفس اچ ملاقات کیتی جیں اچ وفاقی وزیر اقتصادی امور ڈویژن محمد حماد اظہر اتے وزیراعظم دی معاون خصوصی ڈاکٹر ثانیہ نشتر وی موجود ہن۔ نیل بوہنے وزیراعظم عمران خان کوں چنگے طرز حکمرانی ، صحت، تعلیم، ترقی نوجوانان، آبادی تے کنٹرول اتے ماحولیاتی مسئلیں تے قابول پاونڑ جیہوجے امور دے سلسلے اچ اقوام متحدہ دے مختلف اداریں دے متعلقہ حکومتی اداریں تے وزارتاں دے نال سانجھ بارے ڈسایا ۔ اقوام متحدہ دے ریذیڈنٹ کوآرڈینیٹر وزیراعظم عمران خان دے وژن اتے موجودہ حکومت ولوں ماضی اچ نظر انداز کیتے گے انہاں مسلیں نال نبرنڑ کیتے چاتے گے اقدامات دی تعریف کیتی ۔انہاں خاص طور تے حکومت ولوں غذائی قلت پاروں نشوونما دے مسائل، بنیادی طبی نگہداشت اچ بہتری، ماحولیاتی تبدیلی دے خراب اثرات دے خاتمہ کیتے 10 ارب درخت لاونڑ دے منصوبے تے ملک توں غربت مکاونڑ دے پروگرام احساس دے آغاز کیتے کوششاں کوں دی خاص طور تے تعریف کیتی ۔ وزیراعظم عمران خان اپنڑی حکومت دی ترجیحات کوں اجاگر کیتا۔ غذائی قلت پاروں نشوونما تے گال کریندے ہوئیں وزیراعظم عمران خان آکھیا جو حکومت ایں مسلے نال نبڑنڑ تے خصوصی توجہ ڈیندی پئی اے کیوں جو ایں مسئلے دی وجہ توں ملک دی نوجوان آبادی دی نشونما تے بہوں گہرا اثر پوندے ۔انہاں آکھیا جو قبائلی علاقیں دی ترقی موجودہ حکومت دی اہم ترجیح اے ۔ نیل بوہنے وزیراعظم کوں یقین ڈیوایا جو اقوام متحدہ دے ادارے حکومت ولوں کیتیاں ونجنڑ آلیاں انہاں کوششاں اچ اپنڑاں بھرپور تعاون تے مدد کریسن۔
